فتحتي الحلم والتأويل وسيبتيني مهرج والسما سيما وطايش والطريق مراجيح تقول امي بقالك فترة مش مظبوط تبان قلقان لكن مبسوط ومتوتر كده وخايف ومش فاهماك تعبت معاك تكونش ياواد عشقت جديد.
وعن حلمك تعيشي في أرض محدوفة وبيت واسع هنتكلم في أي كلام وأي كلام في ذاته كلام كلام تافه بدون ترتيب مسافه وقت تسمحلي اكون جنبك لأطول وقت.
فيه عندي حوالي ولا موضوع احب افتح كلام فيهم اصالح عمري ف وجودك وانقّح نفسي من الأخطاء على حدودك وعارف اني شيء بائس واني مصاب بمتلازمة وحشتيني وعارف برضه اني كسول بسيب كل الحاجات ع الأرض وريحتي كلها دخان وعارف برضه اني كمان بشجع نادي مش حباه ياستي حياة ولازم نختلف فيها يا أجمل حاجه ف الدنيا ابتليت بيه.
ماصدقتش كلام الناس وصدقتِك زرعت بكل شيء فيا طيابة وخير وجيتلك غير وجيتلك شاري مش بايع برغم اني البعيد صايع ولا ليا ف غرام ولا زفت لكني حلِفت وحلفان الأصيل دستور بإني ببصِلك بغرور وعايزك ليا أبد العمر عرفت ازاي اغنيلك واقولك شعر عرفت ازاي صعيدي يجيب ورود للبنت وعلمني الوصول ليكي ان مهما حزنت.
شبعنا من البشر تجريب وانا شبعتك جعان وصلك كريم أصلك ماهانش عليكي تسيبيني بدون شكراً كإني خدمة العملاء ياعسولة كإن عنيا مسئولة عشان حبت أقولك ايه؟ ماعادش كلام مانا معرفش تمني بكام مجرد ضيف ظهر جنبك ف كام صورة.