قصيدة فلان الفلاني
فلان الفلاني اللي كان يومها جنب ساعة لما بدأوا في ضرب الرصاص
فلان الفلاني اللي معرفش اسمه دايما بقول يابن عمي وخلاص
فلان اللي سابلي بقيت سندوتشه ليلة لما شافني بغنّي و جعان
فلان اللي مش فاكرَه غير شكل وشه فلان اللي عداكي جوه الميدان
فلان اللي فتشني بالإبتسامه فلان اللي قال هو فعلا حيمشي ؟
فلان اللي قاللي طريق السلامة ساعة لما قولنا زهقنا وحنمشي
فلان اللي مرضيش ياخد مني أجره ساعة لما قلت إني رايح مظاهره
فلان اللي قاللي حيتنحى بكره وحنفرح و نرقص و راح تبقى سهره
فلان اللي كان بيناولني القزايز و يقفلها بعد أما اعبيها جاز
فلان اللي يشرب ويسألني عايز ؟ فلان اللي كان وشه مليان قزاز
فلان اللي مطلعش جوه البرامج وكان بس صوته في قلب الهتاف
فلان اللي روح أكل واستحمى فلان اللي ضايع في وسط الآلاف
فلان اللي غرقّلي خل الكوفيه و شالني ساعة لما جت طلقه فيا
فلان اللي مات يومها تلزمله ديه من ابن الفلاني اللي كل لحمه حاف
قصيدة دفتر اسامي الهاموش
يا دفعة يا مرمي ف كشك الحراسة لحد أما يطلع عليك النهار
يا صبحي محمد سعيد الفواعلي نزيـل المــوائد ف سـاعة الفطــار
يا كردي يا صالح يا جندي المراسلة توصــل مدام إنشراح بالخضــار
و ترجع تجيب العيال م الحضانة و تطلع توّدي فلوس الإيجار
و سيد بشندي بتاع النضافة بيكنس تقاطع لاظوغلي ونوبار
و محسن عفيفي بيقطع تذاكر ف خط المنيرة لحد المطار
و سعد المنادي في خط العبور أخو أحمد قناوي أشارجي المرور
و أشــرف شرارة ف نفــس الإشارة بيطلع يوزع بواكي البخور
و عبده السواحلي بتاع الفريسكا بيسرح يوماتي ف شط الزهور
و دفتر أسامي الهاموش و الغلابة بيكبــر ولا توفّيــهوش الكتابة
و تسمن و تتخن كروش الديابة بلحم اللي ماتوا ف أخــر الطابور